Dat Rebeed vun de Spraak un de’eer Sprekerschopp hett vele Wessels in de Geschicht döörmaakt. Ook wat den Status angeit, hett Neddersassisk (Platt, Plattdüütsch, Nedderdüütsch) waarschienlich al allens seen. Bi de Söök na en Vlagg, de dat Neddersassiske as Spraak vertreden schall, weer dat wichtig daarna to kieken, woneem, wanneer un vun ‚keen de Spraak snackt worrn is. Een Bestanddeel vun en noorden Identiteet is bi Neddersassisk- un sülvst bi Düütschsnackers·chen dat Hanseaatsche. Dat röört vun de Geschicht in’n Noorden her, wo de Hanse eer Oorsprung hett un ook de gröttste Verbreden.

De Hanse

Achter düssen Naam stickt en Hannelsgemeen twüschen Länner un Städer. Düsse Verenigen bestünn vööral twüschen dat 12. un 17. Jaarhunnerd. Dat vöörderste Teel weer, dat de Övervaart per Schip seker weer un dat weerdschoppliche Intressen ook in’t Butenland övereen kamen künnen. Dat schull en Bund vun nedderdüütsche Koopslüüd ween, daarmit een meensaam wassen kann döör Hannel un Politiek. Över 300 Städer hebbt sik alltohoop tosamenslaten, üm sekere Hannelsweeg to billen un sik to vernetten. Düsse Kooperatschoon hett vele Städer eerst to Riekdoom bröcht. Dat weer mitünner de wichtigste Verenigen to düsse Tied in Europa.
Vun dat 17. Jaarhunnerd af an güng dat bargdaal mit de Hanse un eer Status, man offitschell is se nienich oplööst worrn, se leevt vundaag as „Ne’e Hanse“ wieder un versteit sik noch jümmers as engen Hannels-, Kultuur- un Politiekbund twüschen de Städer. (Klick „hier“ üm en interaktieve Kaard vun de Hansestäder to seen op de Websteed vun de Ne’e Hanse.)

Wat düsse Hansebund so wichtig för dat hüdige Neddersassisk maakt, is de Vall, dat de lingua franca, de Verkeerspraak, vun de Hanse dat Nedderdüütsche weer. Nauer seggt weer’t dat Middelnedderdüütsche, laters vööral uut Lübeck, dat al meist as en latere Stannardschriftspraak ankeken warrt. To en groten Deel vun de Levenstied vun de Hanse is Neddersassisk somit as Hannelsspraak mang Koopslüüd uut Riga in Littauen, Londen in England, Nowgorod in Russland, Bergen in Noorwegen, Visby in Sweden, Reval in Eestland, un Turku in Finnland bruukt worrn. Oorkunnen, Hannelskuntrakten un mündliche Afspraken weren all op Neddersassisk. Düsse Spraak hett all düsse Spraken bannig beinvloodt, to’n Deel sünd sogaars över 30-50% vun’t Vokabulaar in düsse Spraken direktemang uut dat Neddersassiske övernamen worrn. Dat gifft Wöörböker twüschen Russ’sch un Middelnedderdüütsch uut düsse Tied un sülvst in Eestland gifft dat noch Gebüden, de akraat neddersassiske Naams hebbt, so as „Kiek in de Kök“ in Reval.
För de·n modeerne·n Neddersassisksnacker·sche warrt düsse Tiedafsnid vaken bekeken as dee Hoogtied vun uns Spraak. De Hanse is identiteetsstiften un noch jümmers en wichtigen Fakter, to’t Bispell in Städernaams un anner Symbolick.

Hanseaatsche Dinkhülp

Wat leeg daarso veerner, as düsse Tied, de’eer Symbolick un eer Kultuurfakter nich to nemen un as Grundlaag to bruken för en Vlagg för de neddersassiske Spraak. Över Jaarhunnerden weg geev dat al en klare Symbolick, daarso is dat Överdragen vun eer op de Nutied nich swaar.
En zentraal Bedüden weer ook de „Hansekogge“, en bestimmte Aard vun Seilschip, dat een in de Hanse op’t meerst bruukt hett, för den Hannel, den Verkeer oder ook, mit Kanonen bestückt, in’t Vechten gegen Piraten.

Düsse Aard vun Vlagg oder Wimpel is 1270 toeerst nöömt worrn. Se heet „Vlögel“ un is an’t Topp vun’n Mast anbröcht worrn. Dunntomalen harr Hamborg en heel rode Hanseatenwindvaan, de „roden vlugher“ betekent worrn is. Un in’t Jaar 1299 is eerstmaals de „lübesche vloghel“ uut Lübeck dokumenteert. In de twede Halv vun’t 13. Jaarhunnerd vüngen süss de Hansestäder an, eer egen Vlaggen uuttoboen. Un jemeer Klören weren tomeerst „whyt und rot“ (witt un rood). Uut düsse witt-roden Vlaggen, Wimpels un Vlögels kemen vaken ook de hüdigen Städervlaggen vöördaag un sünd ook af un an mit blau un geel uutwesselt worrn. Ook bi dat Grünnen vun den Noorddüütschen Bund 1867 sünd de Hanseklören witt un rood mit de prüüßschen Klören swatt un witt kumbineert worrn. Düsse Swatt-Witt-Rood Vlagg weer ook laters de Vlagg vun dat Düütsche Kaiserriek.

De Sassenvlagg

As baven seen sünd de Klören witt un rood heel tyypsche Farven vun de Hanse, un se sünd jümmers noch vaken in de Städervlaggen vun de Hansestäder in de Nutied to seen. Wieldat sik en Grootdeel vun de Neddersassisksnackers·chen ook vundaag noch as hanseaatsch betekent, weer de Ümkeersloot klaar:

– Neddersassisksnackers·chen nöömt sik Hanseatschen un Hanseaten
– De Hoogtied vun dat Neddersassiske weer in de Tied vun de Hanse
– Dat engere Rebeed vun de Hanse passt to dat modeerne Spraakrebeed
– De Symbolick vun de Hanse weer al klaar un is licht to överdragen

Daarso weer de Gedank tominnst klaar, wat sik en Vlagg för dat Neddersassiske an de Hanse orienteren müss. Op’t eenvackst to överdregen daarvun weren düsse twee Klören, witt un rood. Dat, tosamen mit dat zentrale Symbool vun den Hanseatenwimpel oder den Vlögel an’n Mast vun de Hanseatenkoggen, mööt mitenanner op so en Vlagg övereen to bringen ween.

Un dat Resultaat is düsse sonöömte Sassenvlagg:

Se hett de Bestanddelen witt #ffffff un rood #cc0000 un den Hanseatenwimpel/vlögel. Se hett düsse Reegvulg vun Klören, wieldat en roden, rechten Deel baven dat optsche Liekwicht eer stören wöör. De Witt-Rode Vlagg vereenbaart beide Klören so as dunntomalen.

Butendem stimmt se mit de veksilloloogschen Regeln na NAVA övereen:
– Se is simpel
– Se bruukt en bedüüdsame Symbolick in Anlenen an de Hanse
– Se bruukt bloots twee Basisklören
– Se bruukt keen Bookstaven, elaboreerte Symbolen oder Segels
– Se bruukt en Munster, dat keen anner Vlagg in düsse Foorm hett

As Opsteller wöör ik mi liekers geern över Feedback un Torüchmellens vreien. Wenn Ji de al jichtenswo bruukt, dee ik mi bannig högen, wenn Ji mi dat toschickt.